Mɛ̈cthook Ril,Mit Puöth
Mɛ̈cthook ril, mit puöth, aa ŋiɛc pïïr ku muöökkä röt apath ku kuat raan rɛ̈ɛ̈r macthok aye ŋiɛc tïŋ. Ŋiɛc pïïr ku muöök ëröt, anɔŋic yï piath ë guöp, ku lääu ë nhom, ku pïïr la läŋ dik apɛi, ku jɔl aa pial ëguuöp kɔc ë baai ebën. Mɛ̈cthook ril, mit puöth, aa röt kuɔny kamken të neŋ yen këjör keek, ku aa kepuöth dɛɛt, ku aa ŋɔ̈th käpuɔth bïk yiök ë piëërdenic akölrial, ku ayekë them bïk buöc kedhie bïk käwïckä dhiɛl yiök ke ye kuat tök. Tënë mɛ̈cthook ril, mit puöth, raan ebën anɔŋ yic, ye yen ke rot yiök ke rɛ̈ɛ̈r ë kacke yiic, ku ee rëër la läŋ, cïnic kë riɛ̈ɛ̈c yen, ku amit puöu, ku nhiɛɛr kacke. Mëdhiëëth aa nɔŋ lon thiek apɛi, lëu bïk kek miëthken muk apath, bïk dït ë läŋläŋ kaya.
Macruöu wïc Riɛl Cök', acë käŋ yiök kabɛ̈t. Käk ë Mɛ̈cthook Ril, Mit Puöth, yiëk riɛl pan Authërelia. Kek kïk, jɔlke kueen.
Jaam.
Mɛ̈cthook ril, mit puöth aa röt piŋ, ku aa jam ë kamken. Wɛ̈tde yic, mëdhiëëth ku mïth aa cïk gam ku tɛ̈ɛ̈ukë kenhïïm bë raan aa puöl bë jam ku bit ŋɛk. Na lä ke ŋɛk aben jam. Kaya, bë raan ya päl kuɛ̈ɛ̈rde bë jam. Mɛ̈cthook ril, mit puöth, aa kuëër looi tënë kɔc macthok ebën, bë ŋɛk ya bɛ̈n ë jam yic, të neŋ kek kä luel, käk kɔc jöör akölaköl. Ŋɛk alëu bë wɛ̈tde tɛɛr ku acïn raan gël yenhom ku lueel elä, ŋɛk acë jam.
Mɛ̈mɛ̈t.
Mɛ̈tmɛ̈t yë kɔc keyiic mat, yen ee 'wäl' ë mɛ̈cthook ril, mit puöth, ke cɔl aŋic röt, lɔn ye kek kuat tök. Mɛ̈tmɛ̈t yic ee ya rɔ̈ɔ̈m käk ë kɔc mat, ku ee ya gäm cï kɔc röt gam ku ee ya ciɛɛŋ path. Mïth aa ye tïŋ ke ye kɔc macthok, nɔŋ nhïïm tɛ̈ktɛ̈k ye kek röt yiök ke nhiɛɛr kɔc macthok ebën. Mɛ̈cthook ril, mit puöth, aa keyiic mat bïk la keny ë piëërden yic.
Loiloi ye rɔm.
Mɛ̈cthook ril, mit puöth, aa rɔm ku loikë käŋ kedhie. Käkkä aa lëu bïk yiic naŋ riɛɛdha, thuëëc, kuɛ̈n anyëkööl, mɛ̈tmɛ̈t ë buro ke kɔc kuöt nhïïm, ku bɛnkë käkken nhiarkë looi, ku loikë ajadhat kedhie. Na le mïth dït tɔ̈ macthok, ka juak ë tɛ̈ktɛ̈k lacök ku wëët ë keek bïk kɔc aa kuɔny loiloi macthok.Kä wïc bë ke nyuuöth keek aa nɔŋ yiic, cɔ̈t bï mïth ŋuɛ̈ɛ̈n
pamäthken ya cɔɔl, bïk röt mät ë loiloi macthok yiic, bë “riënythii määth” looi kek pamäthken bïk mïth aa dɛɛt puöth ku yekë “rëër ëtök”.
Nhiër.
Nhiër aye nyuɔɔth ë dhël puɔth cë matic ye yiök ë kɔc puöth, ku kuëk kuëk bï kɔc keyiëth kuak, ku buöm bë kɔc röt boom ku ciëm ë thok. Mɛ̈cthook ril, mit puöth, aa röt lɛ̈k të ye ŋɛk tɛk thïn ë piëërde yic. Ku gɛm ŋɛk kë wïc ŋɛk yepuööu. Ku nyooth ŋɛk käc ë puööu tënë kuatde, ku luel ŋɛk këden dak yepuööu, dhil nyuɔɔth lɔn ŋic yen tak ku anhiar kuatde.
Kuɔɔny.
Kuat ë raan rɛ̈ɛ̈r macthok, aye ŋic lɔn ye kɔc macthok rëër thïn akölaköl ke bë kuɔɔny gam të wïc raan kuɔɔny tënë keek. Tënë mɛ̈cthook ril, mit puöth, acë rac be raan cööt kuɔɔny.
Gɛ̈mgɛ̈m ëröt.
Kɔc ë mɛ̈cthook ril, mit puöth, athɛ̈ɛ̈k nyuɔɔth ku gamkë röt kä cïk röt wuööc ë kamken. Teer acë pëën tënë kɔc macthok, ku keek aa dhil röt gam ë manyden thok, ku thek ŋɛk kë ye ŋɛk lueel, ku pɛ̈lkë röt awuäcken, ku ye ŋɛk päl këden wïc piände.
Gɛm ërot thïn.
Mɛ̈cthook ril, mit puöth, aa röt gam ku ŋickë röt ciëëŋ ë kamken ebën ë manyden thok.
Mɛ̈cthook ril, mit puöth, aa röt yiök ke rɛ̈ɛ̈r ë duk ku acïn riɔ̈ɔ̈c ë kamken ku ye ŋɛk
ke cë gam looi tënë ŋɛk.
Aläŋläŋ.
Mɛ̈cthook ril,mit puöth, aa nɔŋ riɛl bïk röt waar, të neŋ yen kë jöör ë piëërden yic. Mɛ̈cthook ril, mit puöth, aa käŋ jaam yiic, bïk rɔ̈lden ya tök ku mukkë ŋɔ̈th nhial ë kepuöth. Ku matkë keyiic të neŋ yen kërɛɛc cë tuöl, ku aa dhil latueŋ kepiööc röt käk ë pïïr, ke ye mïth ë muɔny tök ku tiɛŋtök ë manyden thok.
Alɔŋ ë mɛ̈cthook ril, mit puöth, ruän tɔ̈ kam ë kɔc dït ku mïth ee ya muöök la läŋläŋ nɔŋic kuɔɔny kek ë ciëëŋ ëröt ku athɛ̈ɛ̈k, lëu bë mïth cɔl aŋic röt ke ye kɔc macthok.