Muöök ë Mïth tënë Mëdhiëëth lui

Na thööŋ kä ye luɔɔi wïc kek kä ye lon macthok wïc, ka duër a kërilic ëtör tënë mëdhiëëth lui. Kën ee kë wïc bë takic apath ku guir, ba kä macthok ku käwïc mïth kaŋ cɔ̈k piny, kën ee kë lagöi apɛi dït, ku alëu ba kä kɔ̈k cë yïn piɛlic alɔŋ luɔɔi ku macthok ya dɔ̈k yiic amääth ku ŋiɛc ë pïïr ë pïïr path.

Löclöc ë ɣän bï manhdu ya muk thïn të luui yïn, ee töŋ kä riliic ëtör lëu ba lac takic apath. Na nɔŋ mïth ëlɔ thukul tueŋic, ke wɛ̈t thiek apɛi, ba biäk path ye mïth muk thïn lɔc. Tɛk ke mïth aa wïc ë muöök të këc thukul jɔk ku jɔl aa të le thukul thök. Ala ɣän juëc ë muöök tɔ̈ thïn tënë mïth gɔl thukul ku bɛ̈ɛ̈i juëc kɔc thïn. Ku aa la bɛ̈ɛ̈i kɔ̈k ye mïth muk thïn aköl ku Marakëth akutnhom nɔŋ yiic ɣän ë muöök ë mïth.

Thɛmkë bäk matic bäk biäk ë muöök bï wek manhdun ɣäth thïn wïc wedhie. Takkä yic amääth ku tiëŋkä, ye ŋa bë meth ya ɣäth ku ye ŋa bë yen ya dhuk ë biäk ë muöök yic, tëdä alɔŋ ë thukul. Jaamkä yic, ye ŋa puɔl luɔnde yic, lëu bë thäatken ë luɔi guiir, bë naŋ kaam bë rot yiök bë käwïc mïth ya looi thïn. Na lëu raan tök bë kënë ya looi, ke ye kën ŋö, lëu bï mëdhiëth dɛ̈t ya looi, bïk muöök ë manhden rɔm ku loikë käk ë manyden thok kedhie.

Muöök ë mïth tuany alëu bë yic riɛl tenë medhiëëth lui karou. Acïn kën ë tuaany gël tënë mïth. Keek aa kälɛɛn ë gäk ke tuany akööl kɔ̈k. Ke yeen apath bë naŋ raan töŋ ŋuɛ̈ɛ̈n kam kɔc dït karou tɔ̈ macthok, lëu bë lɔ̈k aa rëër kek mïth aköl cï kek gup naŋ juääi.

Të luui mëdhiëëth kedhie, ke ŋɛk adhil naŋ kë ye kony ë muöök ë mïth yic. Ku adhil yecin mat ë ciɛɛŋ ë baai yic. Mëdhiëëth kedhie aa dhil röt yiëk kaam bï keek bɛn aa rëër ke ye tik ke moc, tëdä ke ŋɛk aben rëër ërot ku ŋuɔt ke  ben dhuk ke ye macthok. Mïth aye kë wïc bë keek aa tïŋ ke nhiar, nhiëër cïnic kë dak kepuöth bïk röt aa yiök ciët ke ye kɔc macthok.

Të luui mëdhiëëth kedhie, ke maɣëm apɛi dït , bïk loiloi baai ya looi ëtök. Mɛ̈n alëu bë tuöl të ye raan tök ëkɛm mëdhiëëth ye thɔ̈ɔ̈ŋic yepuööu ciët cë päl luɔɔi käbaai ërot yetök, ku ee lon ë kɔc ebën. Mïth ŋuɛ̈ɛ̈n aa lëu bïk kɔc aa kony ë luɔɔi baai. Kɔc macthok aa lëu bïk luui ebën ë thäaat juëc nhiäknhiäk Aköl ë Dëtem. Ku pälkë kaam ë Niëndhorou yic ke lääu tënë tik ku muɔnyde, bë ŋɛk bɛn ya luui kën ë nhiamde.

 Na lui mëdhiëëth karou ë manyden thok, ke ŋɛk adhil  “ɣɛn” wïc, ɣɛn thä, të cï mëdhiëth döŋ kek mathuliɛ ë mïth yiic, bë keek lɔ̈k aa tïŋ. Kënë ee thä yiëk kaam bï kä kɔ̈k nhiar keek looi thïn, na cie kaya, ke raan aben rëër bë lɔ̈ŋ.

Të luui mëdhieeth kedhie, ka lëu bë yic riɛl bë kaam rot yiök bë man meth kek muɔnyde bɛn rëër tɛ̈ntök kedhie.Aye mëdhiëëth kɔ̈k yiök kepuöth, diët ke naŋ raan dɛ̈t bë bɛn arëër kek ë miëthken, ku benkë rëër kepɛ̈c.

Mëdhiëëth aa wïc ë kaam bïk puöth bɛn miɛt ë kamken kepɛ̈c, bïk luui käk ye kɔc dït looi.